Esta festa celébrase o último domingo do mes de maio e é a máis popular de Ponte Caldelas. Naceu no ano 1.967 como iniciativa dun grupo de amigos para que, á vez que se promocionaba o Concello, dábase saída a unha afección moi compartida na comarca como é a pesca de río. Así se celebra a última fin de semana do mes de maio e, xunto coas diversas celebracións lúdico-festivas, leva a cabo un Concurso de Pesca Internacional na modalidade de salmónidos.

HISTORIA
No ano 1.967, o último domingo do mes de maio, botaba a andar a "Festa da Troita" de Ponte Caldelas, destacando a gastronomía e o Concurso Internacional de Pesca modalidade de salmónidos. A festa nace pola iniciativa dun grupo de amigos afeccionados á pesca (Rafael López, Luís Branco, Enrique Puga e Luciano Martínez, alcalde daquela época), vendo que había gran afluencia de troitas nos ríos que atravesan el termo municipal, ao mesmo tempo que promocionaban a vila.

ACTOS E ACONTECEMENTOS DESTACADOS
A festa nace coa particularidade da edición do por todos coñecido "Libro da Festa da Troita" no que se recollen os programas de festexos, o regulamento do concurso de pesca, os acontecementos máis destacados da vida do municipio (a construción do Colexio Público, a Capela do Casteliño, opinións políticas, a estrada a Pontevedra, o Instituto de Educación Secundaria ...) así como aportacións da vida cultural galega que iremos recompilando ao longo deste apartado. Por todo elo estes exemplares supoñen para todos os habitantes de Ponte Caldelas o recordo ao longo do tempo de todo aquilo que foron e foi a súa vila e o camiño que recorreu ata os nosos días.

Un segundo denominador común de todas e cada unha das edicións da festa é a celebración do Concurso Internacional de Pesca que é coñecido polos afeccionados a este deporte de toda Galicia e mesmo Portugal, e que en consecuencia aglutina a gran cantidade de pescadores que agardan cada ano tan ansiada cita.

COLABORACIÓNS
En canto ás colaboracións podemos destacar as seguintes:
No primeiro número de 1.967 aparece un artigo titulado "Laude da Troita" asinado por Álvaro Cunqueiro. En leste mesmo número aparece outra colaboración titulada "Quodlibet da Troita" do historiador José Filgueira Valverde. Outra colaboración de Cunqueiro ao ano siguinte con "A troita en Ponte Caldelas" e repite Filgueira Valverde coa continuación do artigo do ano anterior. Reaparición de Cunqueiro con "Á troita, en Ponte Caldelas" en 1.970 e que continuará ao ano siguinte con "De novo en Ponte Caldelas". Destacable é o artigo, outra vez de Cunqueiro, en 1.972 "Troitas en Ponte Caldelas" que xa escribe en galego e non como os anteriores que o fai en castelán. En 1.976 destacan unha exhibición de Taekwondo e a organización dun concurso de fotografía. En 1.977 aparece outro ilustre das letras galegas, Celso Emilio Ferreiro con "O Pescador de Cana". En 1.987 o falecido cineasta galego Chano Piñeiro asina un artigo sobre o teatro na vila. En 1.991 celébrase unha exposición filatélica na que se inaugura un mataselos especial conmemorativo da Festa dá Troita.
Como pode verse ao longo do todo este percorrido a "Festa da Troita" de Ponte Caldelas espabiló desde os seus comezo a admiración e a curiosidade non só dos habitantes do Concello, senón tamén dos literatos, pensadores, personaxes políticos e demais adiantados da época. Tratábase de algo novo para aquel tempo e da mesma forma responderon estes personaxes.

 A FESTA NA ACTUALIDADE

O Concurso Internacional de Pesca, modalidade de salmónidos, continúa, xunto co libro do que xa falamos, como punto aglutinador das moitas edicións da "Festa dá Troita" que levaron a cabo. 

O Concurso desenvólvese durante tres días nos que se fan competicións de todas as modalidades e categorías. Os pescadores, chegados de toda Galicia, aproveitan as boas augas do río Verdugo ao seu paso pola vila para competir polos prezados trofeos (doados polas diferentes administracións públicas así como polos diferentes locais comerciais do Concello).

A degustación popular de troitas require unha atención especial. ven celebrando durante os últimos anos e xa adquiriu un importante éxito de participación. Nela todos os hostaleiros da vila exhiben as súas especialidades que son preparadas diante da atenta mirada de todos aqueles que se achegan ao evento e que poderán probar o manxar acompañado dos excelentes viños que se poden atopar na nosa xeografía. Con todo elo preténdese que a "Festa da Troita" sexa cada vez máis por e para o pobo.

A degustación leva a cabo na Alameda de Ponte Caldelas, lugar próximo ao río (50 m.), e que serve como escaparate destas festas por diversos motivos: celébrase o sábado pola tarde en horario que coincide co final do concurso de pesca, polo que o citado recinto serve de lugar de reunión de pescadores, afeccionados, turistas e prensa (diarios de tirada autonómica, emisoras de radio, TVG e televisións locais ...) dando unha magnitude moi importante a este evento.Así mesmo outras iniciativas veñen completar a oferta cultural e deportiva durante os días de celebración. Referímonos ao torneo de fútbol basee que organiza a Escola de Fútbol de Ponte Caldelas e que nalgunhas edicións adquiriu carácter internacional. Destacado o papel que supoñen as exposicións que cada ano sucédense no Salón de Exposicións do Centro Cultural, onde presentaron as súas obras artistas de renome como Carlos García Mourón ou o pintor belga presente na Guía Europea de Belas Artes, Yvan Descamps.

Noutro campo da actividade cultural, atópanse os encontros polifónicos organizados nestas datas pola Coral Valdarrosa de Ponte Caldelas, anfitrioa de tal evento, e na que participan outras masas corais da provincia. A máis diso todo elo atópanse as clásicas e populares verbenas que alegran a vila con distintos pasarúas e actuacións para todos os públicos.

Tratamento á parte requiren a entrega de trofeos do Concurso de Pesca: nel reúnense numerosas autoridades da contorna autonómica que participan nesta entrega, así como os vencedores, participantes, afeccionados e prensa que participan na mañá do domingo do punto e final de tan singular concurso. Volve encherse a alameda de Ponte Caldelas con xentes de toda Galicia.

Como colofón destes actos está o banquete oficial, lugar de reunión das autoridades, organizadores, participantes no concurso de pesca e afeccionados que así o desexen. Celébrase no marco incomparable do Hostal O Verdugo (situado a beiras do mesmo río) e que fora o antigo "Balneario de Ponte Caldelas". Concluindo, poderiamos dicir que nos atopamos cunha festa que aglutina á perfección o aspecto cultural, folclórico, de lecer e gastronómico que toda celebración deste tipo debe ter.

AFLUENCIA DE VISITANTES
Do recorrido que xa levamos feito da "Festa da Troita" de Ponte Caldelas despréndese o seu carácter popular e a aposta da organización (o Concello de Ponte Caldelas) por chegar a todos os públicos, aínda que desde os seus inicios xa fixo falta este obxetivo. Por esta razón e por tratar dunha festa de gran tradición a nivel autonómico, a afluencia de visitantes que responde á atractiva oferta da mesma, é sumamente notable ao longo dos tres días que duran os festexos.

En canto as infraestruturas para a súa acollida remitímonos a páxinas anteriores desta memoria nas que se describen as diferentes posibilidades de aloxamento (hoteis e turismo rural), diversión (locais de lecer, oferta cultural e deportiva, comida (restaurantes), práctica deportiva (campos de fútbol, pavillón polideportivo, pista de tenis ...), cultural (Centro Cultural, Instituto de Educación Secundaria, Centros de Educación Infantil e Primaria ...) co que todo visitante poderase atopar.

MATERIAL PROMOCIONAL
Como material promocional máis destacado atópase o "Libro da Festa da Troita" da edición correspondente e ao que, por formar parte da mesma idiosincrasia da festa, todo o mundo diríxese para ver a oferta de todo tipo da que poderán gozar. 
Nel e como manda a tradición, poderán atoparse o programa de festexos e demais actividades lúdico, culturais e deportivas, así como aqueles temas de actualidade que afecte o desenvolvemento do municipio, servindo así de "liña do tempo" dos acontecementos máis destacados do devir de Ponte Caldelas.

Desde o Concello de Ponte Caldelas como organizador do evento faise chegar estes programas e carteis a todas aquelas entidades que poidan dar saída á información que conteñen: Son repartidos por todos os lugares do municipio e dos municipios adxacentes. Envíanse aos medios de comunicación, tanto prensa escrita como radio e televisión, para que poidan ter saída nestes campos (con resposta moi positiva por parte destes)/destes).

Distribúense vía postal aos demais Concellos da Comunidade Autónoma así como ás Oficinas de Información Xuvenil dos mesmos. Mándanse ás Oficinas de Turismo e a todas aquelas entidades que poidan axudar á promoción da festa.

ACCIÓNS DO CONCELLO PARA A DIGNIFICACIÓN,
MANTEMENTO E PROMOCIÓN DA FESTA
Desde a súa fundación, o Concello de Ponte Caldelas erixiuse como o máximo organizador, promotor e mantedor da "Festa da Troita", inclullendo desde o aspecto económico ata a organización e contratación dos diversos actos, actuacións e verbenas que na mesma levan a cabo. É por tanto que o Concello de Ponte Caldelas soporta o peso desta festa de maneira que se podería afirmar sen dúbida que sen a súa actuación a festa non perdurase ao longo dos seus xa trinta tres anos de existencia.

Así mesmo este Concello continuará con este papel de soporte da festa debido a que a través dela foi conformándose a idiosincrasia mesma da vila e dos seus veciños que cada ano esperan a chegada desas datas para volver gozar dos momentos en que esta festa supón unha unión entre o pasado e o futuro, desde aquel ano 1.967 ata...